العدد 007 لعام 2026

كنز في موقع سكني

يا هلا والله بكل المتابعين في عددنا السابع من نشرة ”البحث عن بيت العمر“. اليوم قصتنا غير، فيها حماس وبشرى سارة، وخطوة حقيقية لأسرة المهندس عيسى والأستاذة بدرية في طريقهم لبيت العمر، فخلونا نعيش معاهم التفاصيل.

عيسى جالس في الصالة، وبدرية جنبه تصحح دفاتر طالباتها، وحمد ونوره يلعبون بالليغو في الزاوية، يبنون بيت ويححدون غرفهم، أمّا عيسى فهو يطالع جواله وعيونه طايرة من الفرحة.

عيسى: بدرية! ما راح تصدقين وش شفت في تطبيق سكني!
بدرية (ترفع راسها وتعدل نظارتها): خير يا عيسى؟ عسى ما شر، لا يكون زادوا الإيجار علينا بس؟
عيسى: لا يا شيخة، فال الله ولا فالك! شوفي، مكتوب إني مستحق للدعم السكني، ومو أي دعم. باقة الدعم السكني المحدثة، 100 ألف ريال كاش وغير مستردة.
بدرية: تمزح؟ 100 ألف مرة وحدة؟ يعني نقدر ندفعها دفعة أولى ونرتاح من هم التجميع؟
عيسى: إي والله، وهذا اللي مكتوب. خليني أتصل على الأستاذ توفيق في مؤسسة البحث عن بيت العمر وأبشره، هو اللي كان يتابع معانا من البداية.

عيسى: يا هلا والله أستاذ توفيق، أبشرك طلعت النتيجة في سكني، ومكتوب إني مستحق للـ 100 ألف!
توفيق: ما شاء الله، مبروك يا مهندس عيسى، تستاهلون كل خير، هذي الباقة راح تسهل عليكم بداية المشوار. وش رايك تشرفنا أنت والعائلة الكريمة في مكتبنا؟ ترى مسوين افتتاح تجريبي لمكتبنا الجديد اللي جنب البحيرة والمدينة العالمية، وبالمرة نوريكم المشاريع المتوفرة على موقع سكني.
عيسى: والله فكرة ممتازة، بكرة العصر نكون عندك بإذن الله. وبعدها ندخل المدينة العالمية. من زمان والعيال يحنون على راسي، يبغون يروحون.

في ضيافة بيت العمر

المكتب مرتب وريحة بخور الافتتاح تصن الرأس، والأستاذ توفيق يستقبلهم بابتسامة.

توفيق: يا هلا والله بالمهندس عيسى، والأستاذة بدرية، ما شاء الله، شباب المستقبل، حمد ونوره مشرفينا.. حياكم الله في مكتبنا الجديد. تفضلوا، هذي قهوة وشاهي، وحمد ونوره لهم نصيب من الحلا.
حمد: بابا، شوف الشاشة الكبيرة هذي، فيها بيوت زي اللي في لعبة الماينكرافت.
نورة: أنا أبي بيت فيه حديقة كبيرة عشان ألعب فيها مع عروستي.

توفيق: (يضحك) أبشري يا نوره، الحين بنشوف كل شي. شوفوا يا جماعة، هذا موقع سكني sakani.sa. الوصول له سهل، تقدرون تدخلون من المتصفح أو تحملون التطبيق، وتسجلون دخولكم عن طريق النفاذ الوطني الموحد، وكل شي بيطلع قدامكم واضح.
بدرية: طيب يا أستاذ توفيق، وش هذي (الوجهات)
و(المشاريع) اللي نسمع عنها؟
توفيق: (يأشر على الشاشة الكبيرة) سؤال ممتاز. (الوجهة) هذي زي ما تقولين هي المنطقة الكبيرة اللي تخططها الدولة وتوفر فيها كل الخدمات، مثل (وجهة الواجهة) هنا في الدمام.

ولأنها كبيرة، فتعطى لأكثر من مطور، لكل مطور مشروع. إذاً، المشاريع هي المجمعات السكنية اللي داخل هذي الوجهة، وكل مشروع له طابعه الخاص، فمثلاً بعضها يركز على الفلل وبعضها على الشقق، وهكذا.

جولة في مشاريع الدمام

الأستاذ توفيق يقلب في الموقع ويوري عيسى وبدرية الخيارات.
عيسى: أنا عيني على المشاريع اللي تحت الإنشاء، أحس أسعارها أهدأ وتصاميمها أحدث.
توفيق: صادق، ومثل حالتكم أنكم ما أنتوا مستعجلين، وبعض المشاريع نسبة الإنجاز فيها كبيرة. شوف مثلاً مشروع (واحة الدمام)، هذا أكبر مشروع الوزارة في المنطقة، فيه أكثر من 2300 فيلا، وأسعاره تبدأ من 619 ألف ريال تقريباً..

وفيه مشروع (نعمى 2) في حي الواجهة، شققهم ذكية وتناسب ذوقكم، وأسعارها تبدأ من 400 ألف للمستحقين. طبعا الأسعار راح تختلف من مستحق الدعم إلى غيره، وحسب المساحات وعدد الغرف وأمور أخرى.
بدرية: طيب والوحدات الجاهزة؟
توفيق: موجودة طبعاً، بس لازم نعزّم ونلحق عليها، لأن الحالة مثل ما تشوفون لهذا المشروع مثلاً (تم إغلاق الحجز)، بسبب كثرة الإقبال، وبعضها باقي فيها (وحدات قليلة متبقية). أمّا الدفع فهو ميسر ومنظّم من خلال برنامج سكني، سواء كاش أو تمويل إلكتروني، والـ 100 ألف اللي جاتكم بتشيل عنكم حمل كبير في الدفعة الأولى.
حمد: بابا، نبي البيت اللي فيه مسبح!
عيسى: (يضحك) اصبر يا حمد، الحين بنشوف اللي يناسب ميزانيتنا ومكان شغلي ومدرسة أمك. يمكن تطلع لنا شقة نسوي لك مسبح صغير في الحمام..

توفيق: المنطقة الشرقية الحين فيها حراك كبير، والخيارات متنوعة بين فلل وتاون هاوس وشقق. أهم شي إنكم عرفتوا طريقكم، والـ 100 ألف هذي هي البداية الحقيقية.
المطلوب منكم الآن، أنكم تعطون موقع سكني الوقت اللي يستحقه من البحث والدراسة وترتيب الاحتياجات ثم الرغبات، طبعا في حدود الميزانية. ولا تترددوا في التواصل معنا للحصول على المزيد من الاستفسارات والمساعدة.

نذكركم بالاشتراك في النشرة البريدية لتصل إلى بريدكم الإلكتروني كل أسبوع https://ForeverHomeHunt.sa

عيسى وبدرية وحمد ونوره

طلعت عائلة عيسى من مكتب البحث عن بيت العمر وهم يحلمون ويخططون ويتخيلون شكل بيتهم الجديد. حمد ونورة يسولفون عن غرفهم وألعابهم، وعيسى وبدرية يحسبونها بالورقة والقلم، بس هالمرة بابتسامة وأمل كبير.

عيسى: مؤسسة البحث عن بيت العمر، ما يخلونك تحتار أبد.
بدرية: لا تسوي نفسك ناسي، المدينة العالمية تنتظرك.. شوفها قدامك، ما هي بعيدة عن مكاتب البحث عن بيت العمر.
حمد ونوره: إيه والألعاب والعشا بعد..
عيسى: تستاهلون، أنا قلبي بدأ يطمئن الآن.

وش الخطة

خلوكم معانا في العدد الجاي عشان نشوف وش اختار عيسى وبدرية من بين هالمشاريع! أو يمكن نرجع للدكتور خالد والدكتورة لينه.

هل لا يزال عندك بعض الأمور اللي ما هي واضحة؟ إذا تبينا نساعدك في مثل الدكتور خالد والدكتورة لينة، أو المهندس عيسى والأستاذة بدرية، تواصل معنا على:

client.success@foreverhomehunt.sa

في كل عدد راح نحاول نجاوب على سؤال حول بيت العمر.

سؤال العدد
يا خبير، أنا ما أرتاح اشتري من موقع على الإنرتنت، بس لأني شفت صورة حلوة مسواة بالذكاء الاصطناعي.

إجابة الخبير

يا هلا بيك.. صحيح.. الثقة هي أهم كلمة في هذه الأمور. أولاً المشاريع هذه معتمدة من وزارة الإسكان، واعتماد الوزارة صعب يحصله إلا المطور الكفؤ. والمشاريع هذي عليها إشراف دقيق من الوزارة وشركة الإسكان الوطنية وضمانات والتزامات كبيرة.

وإذا ودك تزور المشروع، بكل سهولة، بيانات المطور موجودة في الموقع. تواصل معهم وراح يرتبون لك زيارة، لأني أتفق معك، أنك تشوف شي على الواقع، يطمن القلب. ولا تنسى تصور سلفي، وترسل لنا.

عندك سؤال محيرك؟ أرسل لنا سؤالك على الإيميل، وبنجاوبك في العدد القادم!

إخلاء المسئولية

توفّر مؤسسة البحث عن بيت العمر (المؤسسة) هذا العمل (بمجمله وجزئياته والأعمال المرتبطة به ومنها موقع البحث عن بيت العمر ForeverHomeHunt.sa) للجميع بصفة عامة، وقد يستخدمه الباحثون عن بيت العمر أو المستثمرون في المنتجات العقارية، أو المختصون في إدارة الاستثمارات الذين هم على دراية بأعمال إدارة الاستثمارات والتحديات التي تواجهها، أو المتخصصون في الفقه الإسلامي والمعاملات المالية والشرعية، أو حتى غير المتخصصين في المجالات الأخرى الذين يرغبون في الاطلاع والمعرفة. ولا تتحمّل المؤسسة أو أي طرف ثالث مشارك في إعداد أو جمع المعلومات الموضوعة فيه أي ضمانات إلى أقصى حد يسمح به القانون. وتتخلى المؤسسة بموجب إخلاء المسئولية هذا عن كافة الضمانات الضمنية، بما في ذلك ضمانات صلاحية المعلومات لغرض معين. ولا يتحمّل المعد في أي حال من الأحوال أي مسؤولية تتعلق بأي ضرر مباشر أو غير مباشر (بما في ذلك خسارة الأرباح) التي تحدث نتيجة لاستخدام المعلومات. ولا تضمن المؤسسة عند توفيرها لهذا العمل، أن أي من المعلومات الواردة فيه أنها دقيقة، وأنها ستبقى كذلك، أو أن استخدام المعلومات سيضمن صحة أي إجراء يتخذ بناءً على المعلومات المضمنة في هذه العمل. ولا يعد هذا العمل بأي حال من الأحوال توصية لدعم أي قرار بالاستثمار أو تقديم المشورة بخصوصه. وباستثناء ما يسمح به القانون، لا يمكن استنساخ أو إرسال أي جزء من هذا العمل عن طريق أي أسلوب أو وسيلة دون الحصول على موافقة خطية مسبقة من المؤسسة.