ع
Enحياكم في قصة
ليس هناك أسلوب أفضل من رواية قصة، لشرح موضوع وتوصيل معلومة. فقراءة القصة ممتعة، والمعرفة تبقى بتذكر شخصيات القصة والمواقف التي مروا بها.
هل حلم ”بيت العمر“ صار كابوس؟
يا هلا والله بالعائلات الشابة والطموحة.. اليوم نبدأ معكم أول عدد من نشرتنا الأسبوعية، اللي هدفها واحد وبسيط: نكون معاكم، خطوة بخطوة في ”رحلة البحث عن بيت العمر“. أنا توفيق الشمس، وإحنا في مؤسسة (البحث عن بيت العمر)، طبعاً مؤسسة عقارية مرخصة، بس شغلنا مو مجرد بيع وشراء، شغلنا هو أن نقص ”قصة نجاحكم“ في تملك أول بيت، بيت العمر.
قصة العدد: عيسى وبدرية، وإعلان “الألف ريال”!
اليوم الخميس، ”الونيس“ مثل ما يحبون يسمونه شباب هالأيام. عيسى، المهندس اللي كرف طول الأسبوع في الشركة في الخبر، ماسك خط الدمام ورايح لشقته.
في باله شي واحد: ”متى بنرتاح من هالشقة هالإيجار؟ حمودي (حمد) صار في ثالث ابتدائي، ونوّور (نورة) بدأت روضة هالسنة، والأغراض بدأت تستغيث من المستودع الصغير، أو بالأحرى المستودع بدأ يستغيث..، والجيران متأذيين من سيكل حمودي في الممر، وكل يوم مشكلة مواقف السيارات اللي ما تكفينا كلنا.
وهو في الطريق، لفت انتباهه لوحة إعلانية ضخمة إعلان سكن: (تملك بيت العمر بدفعة مقدمة 1000 ريال فقط!).
عيسى في نفسه: ألف ريال؟ معقولة؟ ولا السالفة فيها (تطبق الشروط والأحكام) اللي تخلي الألف تصير مية ألف؟.
على طول، شبك البلوتوث، عشان ساهر ما يزعل، عيسى ما يصرف الريال إلا في محله) واتصل على بدرية.
عيسى: هلا حبيبتي بدرية..
بدرية: ها.. كلام حلو، أيش عندك؟!
عيسى: اليوم الخميس الونيس، قلت أصير شوي رومانسي.
طيب.. أم حمد، شفتي إعلان السكن الجديد؟ يقولون بـ 1000 ريال بس!
بدرية (بضحكة فيها شوية تعب): يا عيسى، أنت مهندس وتعرف السوق. الأسعار عندنا في الفريج وصلت أرقام فلكية، والأراضي صارت أغلى من الذهب. أخاف نتحمس وفي الأخير نكتشف إننا نشتري (سمك في بحر) أو بيت كراتين ينهار بعد أول طقة مطر.
عيسى: والله صادقة يا بدرية. الخوف مو بس من السعر، الخوف من الغش العقاري، ومن الديون اللي تقص الظهر 30 سنة قدام. نبي بيت يلمنا، مو همّ يغمنا.
بدرية: طيب.. والخميس الونيس.. والكلام الحلو؟!
عيسى: بعدييييييييين.
ليش ”البحث عن بيت العمر“؟
عيسى وبدرية يمثلون (الألم) اللي يعيشه كثير من شبابنا:
الحيرة بين الوعود الإعلانية والواقع الصعب.
الخوف من الأخطاء القانونية أو العيوب الفنية في البناء.
الضغط المالي كيف نوازن بين القسط وحياة كريمة للعائلة؟
في مؤسسة (البحث عن بيت العمر)، إحنا ما نتركك تخمن. إحنا نستخدم إطار عمل من 8 مراحل يحول هالقلق إلى مسار واضح.
معلومة على الطاير
هل تعلم أن ”الهيئة العامة للعقار“ تلزم الوسطاء العقاريين بتقديم معلومات دقيقة عن العقار؟
في برنامجنا، إحنا معاكم، نتأكد من ”سلامة الصكوك“ و”تراخيص البناء“ و“الفحص الفني“ وغيرها، قبل ما تدخلون في أي التزامات.
كيف راح نغيّر قوانين اللعبة؟
إحنا في البرنامج نسوي عنك ”الشغل الثقيل“:
تحليل مالي دقيق: قبل ما تتهور وتوقّع، وتتدبس ثلاثين سنة قدام، ندرس وضعك المالي من طقطق لسلام عليكم. نحلل تقريرك الائتماني في (سمة)، ونشوف قدرتك الفعلية على السداد، ونقيم الاستقرار المالي والمديونية الحالية، عشان نضمن إن القسط ما يضغط على جودة حياتك أو يأثر على عائلتك، وننبهك لأي مخاطر محتملة قبل ما تقع الفأس في الرأس. ترى بعدين يا عيسى بدرية بتزعل، وإذا زعلت بدرية، تعرف يا عيسى أيش يصير.
الاستحقاق للدعم الحكومي: نتأكد لك إذا كنت تستحق دعم ”سكني“ أو أي برامج دعم حكومية ثانية، وكيف تستفيد منها بأفضل طريقة ممكنة، عشان توفر على نفسك مبالغ كبيرة، أو تقلل فترة القرض.
تصوير 3D ونظارات واقع افتراضي: يعني ما يحتاج تضيع وقتك في زحمة الشوارع، والمواعيد غير المناسبة، وتشوف أمية بيت وبيت، وتتعب وتنسى البيوت اللي شفتها في البداية. معنا بتشوف البيوت وأنت جالس في بيتك، وإذا عجبك شي، نروح له ميدانياً.
توفير اقتصادي: هدفنا مو بس تشتري، هدفنا تشتري ”بأفضل قيمة“. يعني نطلع لك العيوب المستترة قبل ما تدفع ريال واحد.
مرافقة كاملة: من أول يوم تفكر فيه، لين تستلم المفتاح وتصور سناب وأنت تقول: ما شاء الله، تبارك الله، باركوا لي يا شباب، قولوا منزل مبارك!! يا شباب.. بصراحة اشتراكنا في رحلة البحث عن بيت العمر كان أفضل قرار، وخلى حلمنا يصير واقع. الفأل لكم يا شباب.
عيسى: تدرين يا بدرية لو بس وقتي يسمح كان فرفرت الأحياء الجديدة وقارنت بين الخيارات الكثيرة… بس أنت عارفة مكروف حدي في الشغل.
بدرية: شكلك نسيت.. تراك مواعدني توديني السوق والأسبوع الجاي بنروح بيت أهلي وبعده بنسافر
إذا أنت مثل عيسى؟ لا تضيع في زحمة الإعلانات. اشترك في النشرة البريدية لـ(برنامج البحث عن بيت العمر)، وخلنا نبدأ الرحلة سوا.
وقفة تأمل: ليش التخطيط المالي مو رفاهية؟
شراء البيت هو أكبر قرار مالي بتاخذه في حياتك. التخطيط المالي للمستقبل مو بس عشان تسدد القسط، هو عشان تضمن إن عائلتك تعيش بأمان، وإنك تقدر تغطي مصاريف عيالك وتعليمهم والتزاماتك الثانية بدون ضغوط.
البيت لازم يكون ”أصل“ يزود استقرارك، مو ”عبء“ يهدد مستقبلك. في برنامجنا، البحث عن بيت العمر، راح نساعدك ترسم هالصورة الكاملة قبل ما تخطي أي خطوة.
وش الخطة
عيسى وبدرية قرروا ما يستعجلون، وقرروا يستشيرون مختصين. في العدد الجاي، بنشوف كيف عيسى بدأ يحلل وضعه المالي، وكيف اكتشف إن ”بيت العمر“ مو بس جدران، تراه قرار مالي مصيري.
عيسى يتصل
بعد سوالف عيسى مع بدرية، ما عرف يستقر، ما قدر يشيل الموضوع من رأسه. تذكر صديق له مدح له مؤسسة (البحث عن بيت العمر)، وقرر يتواصل معهم. جاء الرد عليه بأسلوب مهني وراقي: أهلاً بك في مؤسسة البحث عن بيت العمر، معك توفيق الشمس، كيف أقدر أخدمك اليوم؟
بدأ عيسى يشرح وضعه وحيرته، وتوفيق كان يسمع بإنصات ويسجل الملاحظات، وبمهنية بدأ يسأل عيسى أسئلة دقيقة ساعدته يتعرف على أفراد عائلته، والعمل والدراسة وظروفه المالية وغيرها. وبمجرد ما اكتملت الصورة، رد توفيق بابتسامة واضحة في صوته: تسلم أخوي عيسى، الحين الصورة صارت واضحة. الله يحيك ويحيي أهل الدمام. صدقني، أنت وأم حمد تمثلون شريحة كبيرة من عيالنا اللي نعتز بخدمتهم، والحيرة اللي تعيشونها طبيعية جداً، الكل يمر بها، بس مع التخطيط الصح، كل شي يهون بحول الله.
توفيق كمل كلامه وهو يطمن عيسى: إحنا في المؤسسة مكرسين كل جهودنا عشانكم. حالياً، قاعدين نجهز محتوى متميز ومجاني، هدفه بس يوعي العائلات السعودية ويحميها من الأخطاء المكلفة. نبيكم تدخلون هالمرحلة وأنتم فاهمين كل تفاصيلها.
عيسى ارتاح لكلام توفيق، وسأله عن الخطوة الجاية، ورد عليه توفيق: بسيطة يا أخوي عيسى، أبد.. خلك مشترك معنا في هالنشرة البريدية، وأول ما يفتح باب التسجيل في البرنامج بنعطيك خبر فوراً. وخلال هالفترة، أي سؤال يطري على بالك، لا تتردد.. أرسله لزملائي في فريق (نجاح العملاء) على الإيميل:
Client.Success@foreverhomehunt.sa
وبيردون عليك بأسرع وقت، وما تدري يمكن سؤالك يكون فكرة عدد جديد من النشرة البريدية.
سؤال خبير بيت العمر
في كل عدد راح نحاول نجاوب على سؤال حول بيت العمر.
سؤال العدد
يا خبير، محتار بين إني أشتري أرض وأبنيها على ذوقي (أرض وقرض)، أو أشتري بيت جاهز من مطور عقاري.. وش تنصحني؟
إجابة الخبير
يا هلا بيك.. هذا سؤال المليون!
باختصار:
البناء الذاتي يعطيك حرية كاملة في التصميم والجودة، لكنه يحتاج ”نفس طويل“، وخبرة في التعامل مع المقاولين، ومتابعة ميدانية يومية، وقروش بعد، وغالباً بياخذ منك وقت وجهد وتوتر أعصاب، وأحياناً إعادة بعض الأعمال أكثر من مرة حتى ترضيك.
أمّا الجاهز فراح يوفر عليك الوقت والجهد، وتقدر تسكن فوراً، لكنك تشتري ”منتج نهائي“ ما تدري وش تفاصيله تحت اللياسة والسيراميك، وهنا تجي أهمية ”الفحص الفني“ اللي نساعدك أنك نسويه مع شركة معتمدة.
وهناك أيضاً خيار يسمونه ”البيع على الخارطة“ وخصوصاً مشاريع وزارة الأسكان (سكني). وهذا يكون عليه دعم حكومي إذا تنطبق عليك الشروط. وقد تختار مشروع في بدايته، وتنتظر فترة إلى أن يجهز، وأحياناً هناك مشاريع مكتملة وتقدر تستلم فوراً.
أحنا في (البحث عن بيت العمر) نساعدك، بعد ما نقوم بتحليل وضعك المالي، واحتياجاتك ومتطلباتك، وأحلامك بعد.. ثم نعرض عليك الخيارات بما لها وما عليها، عشان قدر تختار الأنسب لك ولعائلتك.
عندك سؤال محيرك؟ أرسل لنا سؤالك على الإيميل، وبنجاوبك في العدد القادم!
إخلاء المسئولية
توفّر مؤسسة البحث عن بيت العمر (المؤسسة) هذا العمل (بمجمله وجزئياته والأعمال المرتبطة به ومنها موقع البحث عن بيت العمر ForeverHomeHunt.sa) للجميع بصفة عامة، وقد يستخدمه الباحثون عن بيت العمر أو المستثمرون في المنتجات العقارية، أو المختصون في إدارة الاستثمارات الذين هم على دراية بأعمال إدارة الاستثمارات والتحديات التي تواجهها، أو المتخصصون في الفقه الإسلامي والمعاملات المالية والشرعية، أو حتى غير المتخصصين في المجالات الأخرى الذين يرغبون في الاطلاع والمعرفة. ولا تتحمّل المؤسسة أو أي طرف ثالث مشارك في إعداد أو جمع المعلومات الموضوعة فيه أي ضمانات إلى أقصى حد يسمح به القانون. وتتخلى المؤسسة بموجب إخلاء المسئولية هذا عن كافة الضمانات الضمنية، بما في ذلك ضمانات صلاحية المعلومات لغرض معين. ولا يتحمّل المعد في أي حال من الأحوال أي مسؤولية تتعلق بأي ضرر مباشر أو غير مباشر (بما في ذلك خسارة الأرباح) التي تحدث نتيجة لاستخدام المعلومات. ولا تضمن المؤسسة عند توفيرها لهذا العمل، أن أي من المعلومات الواردة فيه أنها دقيقة، وأنها ستبقى كذلك، أو أن استخدام المعلومات سيضمن صحة أي إجراء يتخذ بناءً على المعلومات المضمنة في هذه العمل. ولا يعد هذا العمل بأي حال من الأحوال توصية لدعم أي قرار بالاستثمار أو تقديم المشورة بخصوصه. وباستثناء ما يسمح به القانون، لا يمكن استنساخ أو إرسال أي جزء من هذا العمل عن طريق أي أسلوب أو وسيلة دون الحصول على موافقة خطية مسبقة من المؤسسة.